Deputetët tentojnë konstituimin e Kuvendit jashtë afatit kushtetues

Hamza: Për ish-krerët e UÇK-së, presim vetëm vendim lirues

Kryetari i PDK-së, Bedri Hamza, ka thënë se data 16 shtator është jashtëzakonisht e rëndësishme, pasi pritet vendimi përfundimtar ndaj ish-krerëve të Ushtrisë Çlirimtare të Kosovës.

Hamza, para nisjes së seancës për konstituimin e Kuvendit, tha se pret një vendim lirues për udhëheqësit e UÇK-së, duke theksuar se lufta e tyre ishte e drejtë dhe për liri, pavarësi e dinjitet.

“Lufta e UÇK-së ka qenë e drejtë, luftë për liri dhe pavarësi, për dinjitet. Mbi bazën e asaj që është zhvilluar, është e paqartë se nuk ka asnjë mundësi dhe asnjë arsye tjetër që vendimi të jetë ndryshe, përveç një vendimi lirues”, ka thënë Hamza.

Ai ka thënë se, bazuar në zhvillimet e procesit gjyqësor, nuk sheh arsye që vendimi të jetë ndryshe nga ai lirues.

“Presim çlirimtarët tanë të jenë në Kosovë, në familjet e tyre, në shtetin e tyre dhe të jetojnë të lirë”.

Zemaj: LDK-ja s’e voton asnjë emër të propozuar nga LVV-ja për kryekuvendar

Deputeti i Lidhjes Demokratike të Kosovës, Armend Zemaj, tha se partia e tij nuk do të votojë asnjë emër të propozuar nga Lëvizja Vetëvendosje për kryetar të Kuvendit të Kosovës.

“Ky është vendim i të gjithë deputetëve, nëse dikush personalisht ka ndryshuar mendimin është në vullnetin e tij”, tha ai.

Aleanca bojkoton seancën

Në seancën e thirrur për të mërkurën pritet të marrin pjesë të gjithë deputetët e partive parlamentare, me përjashtim të atyre të Aleancës, të cilët kanë thënë se nuk do të marrin pjesë në Kuvend.

Kryetari i Aleancës, Ardian Gjini, ka thënë se nuk pranojnë që Kuvendi të fyhet në këtë formë.

Ndërkaq, PDK-ja dhe LDK-ja pritet të marrin pjesë në seancë.

Deputetët kanë nisur të mblidhen për të tentuar konstituimin e Kuvendit, jashtë afatit kushtetues. Kjo për shkak të mosmarrëveshjeve që vazhdojnë të kenë rreth çështjes së presidentit.

Marrëveshja mes Lëvizjes Vetëvendosje dhe Lidhjes Demokratike të Kosovës për presidentin është kundërshtuar nga gjashtë deputetë të LDK-së.

Kandidati i përbashkët i LVV-së dhe LDK-së për president është Bekim Sejdiu. Mirëpo, bazuar në deklarimet publike, ai nuk i ka votat e nevojshme për t’u zgjedhur president.

Albanian Post do të ndjekë LIVE zhvillimet nga Kuvendi i Kosovës dhe do t’ju sjellë në kohë reale çdo zhvillim nga seanca.